IL FARO LIGURE 
 appunti de viægio , attrovæ in sciä ræ , ä descoverta da nostra identitæ....
( Istöia , lengua e tradissoin da nostra tæra )


L' ûrtima zunta a l'è stæta fæta o 1 de Lûggio do 2002 

N.D.R.
Me ne staiò pe 'n po de tempo fêua da Zena , e quande rientriò no sò se porriò dedicâ ancon o mæ tempo libëo a-o scïto . Se gh'è quarchedûn co voese piggiase e continuâ o travaggio do scïto c'o se fasse avanti . 
A proscima pûbblicassion do IL FARO LIGURE a "dovieiva" ëse in to meise de settembre . N'approfitto ascì pe domandâ za scûsa a quelli che in te sto periodo me scrivian ma no porrian riçeive e mæ risposte .
Grassie e a risentiçe .
IMPAREMMO O ZENEIZE
ORTOGRAFIA E PRONUNÇIA DA LENGUA ZENEIZE

POULE DE LIGÛIA
 CANSOIN E POEXÏE IN ZENEISE 
SE DIXE A ZENA ...
DÏTI  DA NOSTRA TÆRA
PARLÂ FORESTO

ÄTRE LENGUE MINOITAIE
PILLOE DE LIGÛIA

FÖE E STÖIE DA NOSTRA REGION
GH'ËA 'NNA VOTTA

PE NO ASCORDÂSE O NOSTRO PASSOU
SPRUINÂ

GOSSE DE LIGÛIA DA SCOVRÎ IN SCÏ SCÏTI  INTERNET E IN LIBRERIA
I MÆ CONSEGGI

E CONNESCIOIN CIÛ INTERESSANTI
 IDEE E PENSCËI IN LIBERTÆ
(SCÏTO AMATORIALE , PE  NO  SCORDÂSE  E  NOSTRE  REIXE)
(CIÆTI , VIGNETTE E NOTISSIE DE ATTUALITÆ )
STRAORDINÄIA SCOVERTA ARCHEOLOGICA A MONTEVËGIO :

I LIGÛI COMME I EGISSIEN COSTRÛIVAN PIRAMIDI !!!
AMMIOU DA 'N PAISAN

LIBERTÆ DE PAROLLA Ò PAROLLE IN LIBERTÆ ?
L'ERRÔ O L'È IN TO NOMME :

SE SCRIVE PADANIA SE LËZE LIGÛIA
L'ÛRTIMO LIBBRO DE VALERIO MARCO BOTTO : 

I ANTIGHI LIGÛI DO LEVANTE
A NOSTRA REGION A CIÛ VËGIA D' ITALIA :

VËGIA LIGÛIA O LIGÛIA DE VËGI ?

O TESTO DA CANSON "O STELLA MARIS" :
AVE MARIA IN ZENEIZE
RIÇEVEMMO E PÛBBLICHEMMO 'NNA LETTÏA DE MIRKO ODEPEMKO:

"Avventura Politica di Mirko ODEPEMKO con Sergio CASTELLANETA"

A PETACCHINN-A  DO MEISE :
.... E POI DIXAN A VIOLENSA IN TI STADDI

N.D.R.
CANGIAMENTI DE INWIND
 I VËGI EDITORIALI

ARCHIVIO

CULTÛA LIGÛE
E ÄTRO ASCÌ....
SCAREGÂ

SCAREGA  MÛXICA DOCUMENTI E IMMAGINI 
RÏE O CIANZE

ÛN RISO AMÄO DAVANTI A-E CÖSE DA VITTA
RAI , MAI CIÛ

 A GIUSTA MAINEA PE NO PAGÂ CIÛ  O CANONE RAI
A LEZZE 62/01

LËZI  A LEZZE C'A REGOLAMENTA I SCÏTI DA RÆ
FANTASPORT

FANTABALLON


 




IDEE E PENSCËI IN LIBERTÆ


I LIGÛI COMME I EGISSIEN COSTRUIVAN PIRAMIDI !!!


 
A porrieiva ëse 'nna straordinäia scoverta quella che han fæto di archeologi in ta ciann-a brianzêua , pe-a precixon vixin a Montevëgio in provinsa de Lecco . Tre piramidi che , da ciû de 5000 anni , stavan lì , ascose , a testimoniâne e nostre origini storiche . A scoverta dë ste tre piramidi a l'è stæta fæta pe cäxo . Vint'anni fa , quella zona li , a l'ëa diventâ Parco Regionale da Region Lombardia , e nisciûn , ma propio nisciûn , s'ëa mai dæto conto de quello che se stava sciaccando co-i pê . 
L'è stæto analizzando 'nna fotografia da l'erto de quelle zone , che l'archeologo Vincenzo Di Gregorio o l'aiva notou ûn grûppo de strûttûe molto strane . A forma a l'ëa piramidale e quande o grûppo de archeologi o l'è anæto a vedde in sciö posto se son accorti che quelle montagnette no ëan natûali , benscì ëan de vëe e propie opëe de architettûa . 
L'analixi a l'ha dappêu açertou che son stæte scorpïe in ta prïa , in te 'n coston roccioso c'o stava li da tantiscimi anni , ûn po comme a l'ëa stæta scorpïa a Sfinge egissiann-a . Ste opëe son erte 40-50 metri , scorpïe segondo ûn andamento a gradoin , can tanti paggiêu scimile a tante ätre piramidi che se pêuan vedde in te çivilte misteiose comme i maya e i aztechi . A datassion fæta da-i archeologi a parla de 4000-5000 anni fa , saieiva a dî intorno  ciû o meno a-o 3000-3500 a.c. . 
A primma de queste 3 piramidi a l'è stæta ciammâ "Collina dei cipressi" za che propio in çimma gh'è , missi in tondo , dozze çipresci a çircondâ ûnna grande prïa de granito . 
A segonda a l'è stæta ciammâ "Belvedere Cereda" , dove oua se stan conçentrando i travaggi de scavo perche in ta çimma l'è stæta attrovâ 'nna costrûssion çeltica do 500 a.c. , mentre a tersa , ciû a est , a l'è ancon coverta da 'nna fitta boscaggia .
A cösa ciû sorprendente a l'è che e tre piramidi ligûi g'han o mæximo orientamento  dë piramidi egissian-e de Cheope , Chefren e Miçerino , saieiva a dî  in corrispondensa da Çintûa de Òrion ( Osiride ) , c'a l'ëa 'nna costellassion sacra . E ascì i condûti che se attrêuvan drento ä piramide ciû grande son orientæ verso de stelle ben precise .
Ascì e popolassoin ligûi dunca tiavan sciû de piramidi , comme i egissien e comme i Maya e i Aztechi . E alloa pêu piggiâ davvëo corpo l'ipotexi che quarchedûn l'aiva za fæto , e che mi aivo za scrïto in te Pilloe de Ligûia parlando de föe riguardanti e origini do nostro popolo , segondo a quæ i Ligûi porrieivan ëse discendenti , assemme a-i egissien e a-e misteiose popolassoin do çentro america , di antighi abitatoî do continente perdûo , Atlantide .
I lati de tûtte e tre e piramidi g'han a mæxima inclinassion , çirca 44 graddi , e son o spëgio perfetto in sciä tæra da disposission che e 3 stelle da çintûa de Orion aivan in ta volta çeleste 12500 anni fa . In quella epoca quelle stelle ëan importanti perchè i antighi egissi poeivan calcolâ con precixon o verificâse da pinn-a do sciûmme Nilo . E inondassoin do grande sciûmme ëan sacre , za che da ste pinn-e dipendeiva a fecondassion di campi e o bon andamento da stagion agricola . 
Finn'oua se poeiva negâ ûn legamme de parentela tra Ligûi , Egissien e Atlantidi , perchè no gh'ëan forme archittetoniche scimili a quelle azteche o egissiann-e in ta stöia do nostro popolo . Oua però , a seguito de sta incredibile scoverta , pêu e deve cangiâ davvëo tûtto . A föa de Atlantide e di sò mistëi a nasce con Platon in to 350 a.c. e a mostra che i antighi greçi za conosceivan l'existenza de 'n ätro continente a-o de là do mâ . E date che o Platon o ne dixe , faieivan risalî a fin de Atlantide in to 10000 a.c. , saieiva a dî 5000-6000 anni primma che commensasse uffiçialmente a çiviltæ egissiann-a . 
L'è poscibile tûtto questo ? Ma alloa se a çiviltæ egissia a l'è nasciûa in to 3100 a.c. , perchè a Sfinge a vegne datâ comme vëgia de 10000 anni ? I mistëi son ancon tanti ma a scoverta in ta ciann-a brianzêua a pêu arvî nêuve e ciû interessanti stradde pe arrivâ a descrovî e origini do nostro popolo .

Poei asci anâ a lëze e foe in scë origini di Ligûi in ta rûbrica PILLOE DE LIGÛIA

In te foto poei vedde 'nna vista da l'erto de due piramidi ligûi in to Parco Regionale do Curon , in provinsa de Lecco
< vanni a toua di argomenti >
 
 



AMMIOU DA 'N PAISAN
DE
IL FARO LIGURE
LIBERTÆ DE PAROLLA O PAROLLE IN LIBERTÆ ?

Quante contan anchêu e parolle ? Quante peisan , quante vän ? L'è za da 'n po de anni che ogni tanto , periodicamente , sta domanda a se me cianta in ta testa . Saià che mi , fin da quand'ëo ûn gardetto , son sempre stæto de poche parolle : o vëgio stereotipo do zeneize diffidente e serrou o se me adatta ben . Cöse l'è che m'ha fregou , l'è che mi ho sempre dæto ûn gran valô a-e parolle : ciû che dî 'nna parolla in ciû o sempre preferïo dîne ûnn-a in meno . E no per avariçia , perchè tanto e parolle son de badda . Ma perchè pe mi a parolla a l'è sempre stæta dêuviâ pe çerca de dî quarcösa de vëo , de ciæo , quarcösa c'o no fuise dïto coscì tanto pe dî .
Quante contan anchêu e parolle ? Quante peisan , quante vän ? Ho sempre çentellinou i sêunni che sciortivan dä mæ bocca , perchè pe mi a parolla a doveiva avei 'n fin , bello o brûtto c'o fuise , costrûttivo o destrûttivo , ma avei ûn fin . Attrovâme assettou in cöa da-o mëgo e ciætezzâ cö vixin de carega in sciö tempo o in sciö ballon , pe mi ëan parolle sprecæ , cacciæ via . Tanto ciû perchè quelle nostre parolle no avieivan avûo moddo de poei cangiâ ni o tempo , ni e squaddre de ballon . L'è bella a libertæ de parolla , ma e parolle in liberte pêuan ëse ben ben pericolose . Ho visto e sentïo çerte telecronache RAI a-i mondiali de ballon quande zûgava l'Italia da fâ vegnî a pelle d'oca : ädritûa se negava quello che tûtti poeivan vedde . S'ammiava i erroî di arbirtri invece che ammiâ e criticâ i madornali erroî davanti ä porta do Vieri o do Tommasi o do Gattuso . E parolle do Pizzul e do Bulgarelli son stæte e saian pericolose : o giorno de Corea-Italia ëo ä menn-a e doppo c'a l'ëa finïa a partia  ho sentïo figgêu de 7-8 anni plagiæ da-e parolle d'odio do Pizzul . Ma comme o fâ o Pizzul dappêu a criticâ a violensa in ti staddi , quande lë o l'è o primmo a fomentâla co-e sò parolle . O sacro furô italico o g'ha inorbïo o çervello : poscibile che tûtte e partïe fuisan di complotti contra l'Italia ? E i motivi ? Nisciûn l'ha dïti !! O foscia l'è ciû probabile c'o complotto o fuise l' alibi çercou fin da l'inissio pe giûstificâse ?
Internet , satelliti , bit , telefoni , e parolle viägian in pochi segondi da 'nna parte a l'ätra do mondo ma dappêu in realtæ quante contan anchêu e parolle ? Quante peisan , quante vän ? E a parolla a l'è soggettiva ? A l'è quello c'a vêu dî ò a  pêu voei dî 'nna cösa pe mi e ûnn'ätra cösa pe ätre personn-e ? Ma se 'nna parolla a l'ha ûn scignificato , a pêu pe contra avei 'n ätro scignificato magara opposto ? Sto tarlo de parolle o m'è sciortïo seguendo a politica ä fin di anni '80 : a l'epoca tutto l'ëa ciæo , i ommi e e donne de gexa votavan democraçia cristiann-a , i comunisti votavan partïo comunista , i fascisti votavan movimento soçiale . Dappêu l'è cangiou tûtto : e han commensou a cangiâse o nomme , a dâse di titoli dêuviando o nêuvo nomme pe mëgio accreditâse . E alloa son sciortïi i progrescisti , i riformisti , i democratiçi , i democratiçi de scinistra , Forsa Italia , forsa de chi e forsa de là . Ûn tempo l'ëa ciû sencia a cösa :  se primma mi ëo do partïo comunista voeiva dî che i ätri che no a pensavan comme mi no ëan comunisti , ma soçialisti o repûbblichen o democristien ; ma oua se mi son ûn politico progrescista vêu dî che chi no a pensa comme mi o l'è ûn c'o no vêu o progresso ? Se mi son un politico democratico , o mæ avversaio o saià antidemocratico , se mi son ûn democratico de scinistra vorrià dî che a scinistra i ätri no son democratiçi , se mi son ûn riformista o mæ avversaio o saià ûn c'o no vê fâ e riforme ? E quelli mæximi che se dan sti belli nommi chi , i dan ascì a-i avversäi ciammandoli , quande va ciû che ben , conservatoî . Ma comme a l'è alloa che i conservatoî fan ciû riforme dei riformisti ?
E parolle no g'han ciû o scignificato de 'n tempo . No pensala comme çerta gente  l'è suffiçiente  pe ëse ciammæ rassisti e csenofobi . Emmo visto in Fransa movimenti de estrema scinistra çercâ de bloccâ e vendite do libbro de Oriana Fallaci , portandola in tribûnalle : ma alloa me domando dove o l'è o prinçippio , sancïo dä Convenscion di drïti de l'ommo , da libertæ de esprescion ? In Italia no semmo da meno : semmo arrivæ a di punti coscì bassi in ta politica italiann-a che anâ pëzo penso saià molto diffiçile . N'ho avûo a prêuva provâ seguendo i ûrtimi fæti politiçi relativi ä nêuva lezze in scë l'immigrassion . Parolle sparpaggiæ in parlamento a-i 4 venti , aggettivi tiæ comme cotellæ , fraxi dêuviæ comme kalasnikov da-i terroristi , parolle de quæ no se conosce manco a forsa e o scignificato .
Ho sentïo politiçi parlâ de rassismo e de schiavismo söo perchè no tûtti pe fortûnn-a a pensan comme liätri . E alloa ho piggiou a lezze in te man e ho provou a çercâ dove l'è o rassismo e o schiavismo in te sta lezze , ma no l'ho attrovou , a-o conträio ho attrovou 'nna lezze c'a vêu impedî a-i bacchen de sfrûtâ a miseia di pövei clandestin . Ascì perchè ste parti che dixan ëse rassiste son ben ben dêuviæ in tanti paixi "progrescisti" . A parte ciû rassista dixan ëse quella in scë impronte digitali : ma alloa quande me l'han piggiæ pe-o serviçio militare , m'han discriminou ?
Ho sentïo o prescidente da Camera che manco o sa cöse vêuan dî çerte parolle e manco o conosce o codiçe penale : ma l'è poscibile sto fæto chi ? Pe fâ 'n esempio a quæ ho ascistïo , doppo che o sciö On.Violante o l'aiva parlou , etichettando o discorso de 'n ätro parlamentare comme "nêuvo manifesto do rassismo e de l'odio çivî" , sûscitando e rimostranse do "rassista" , o Casini o l'è intervegnûo dixendo che o Violante quella frase o a poeiva dî perchè "o no g'aveiva miga dïto c'o l'ëa ûn delinquente" !!!!!!!
Comme no ! O Gexûmmaia , ma Casini , ma cöse belin ti dixi !!! O rassismo o l'è ûn reato perseguitou da-o codiçe penale , o rassista o l'è foscia pëzo de 'n delinquente pe-a lezze italiann-a , sciô Casini .
A libertæ de parolla a vegne dêuvia molto sovente ,e ascì da mi , pe sparpaggiâ a drita e a manca parolle en libertæ . Ma ûn conto son e mæ parolle , ätra cösa e parolle de 'n parlamentare .
Son söo parolle : ma çerto che se dovescimo dâ a menti a-o scignificato de parolle , ûn c'o se ciamma Casini , ò se ciamma Violante , comme o partiçipio presente do verbo  Violâ , l'è tûtto dî  .............


< vanni a toua di argomenti >
 
 




SE SCRIVE PADANIA , SE LËZE LIGÛIA
A Padania a no l 'existe" ne dixan tanti e tanti cäi patrioti italien : l'è vëo , ghe diggo mi  ! L'errô o l'è che se scrive Padania ma se deve lëze Ligûia . Za aivo scrïto , e no besêugna mai stancâse de ripetilo , che reçenti stûddi han dimostrou comme i ciû antighi popoli europpei son i Ligûi , i Baschi e i Sardi . In moddo particolare i Ligûi  han çivilizzou ûnna vasta zona , da-i Pirenei finn-a a l'Italia Çentrale . Dunca o popolo ligûe o l'è a Grande Moæ di attuali popoli paden . Ancon primma do mille a.c. e popolassoin da Val Padana ëan ligûi : e no söo in Piemonte , in Lombardia ma ascì in provinsa de Modena co-i Friniati e in provinsa de Lûcca , co-i Apuani .
L'existeiva , a-o de là de differense dë väie tribû , ûnna lengua quæxi ûnitäia e a çertessa de avei 'nna origine comûne . Ancon anchêu , çittæ e paixi che finiscian in "ate" "asco" "usco" mostran a lö ciæa genesi ligûe . Conferme vegnan ascì da prêuve genetiche e biologiche de l'Ûniverscitæ de Torin e da-i stûddi portæ avanti da-o Prof. Alberto Piazza . L'è ascì pe fâ conosce a vëa ligûstiçitæ da Padania che l'è nasciûo "Ligys" , ûnn' assoçiassion c'a l'ha comme fin " a difeisa de l'identitæ , dë tradissoin , e da cultûa do popolo ligûe  da svilûppâ attraverso opëe de riçerca storica e in sciö territöio " . 
Ligys a l'ha a sede a Varazze in via Quinno 5 (tel.0199355792) .
 A MORTE DI VËGI ÇINEMA ZENEIXI
A guæra de sale Multiplex a commensa a fâ e primme vittime . De fæti mentre o Porto Antigo e a Fiumara se spartan ciû da meitæ do pûbblico , e sale do çentro , da C.so Buenos Aires a Via XX Settembre cian cianin van serrando . L'è in ste giorni chi che l'Odeon o sëra i battenti cö rischio de no arvî ciû . Finn-a l'Universale co-e sò 3 sale o l'è in peigo . A scelta do Comûne e di distributoî a l'è stæta ciæa : fâ sciortî i film in tante sale ciû piccinn-e , in ti Multiplex , pe eliminâ e grendi sale . A l'è a çernita de mercou di americhen e passià ascì chi a Zena quello che le za passou in to resto do mondo . E sale serrian , e restian söo i Multiplex a mangiâse ûn con l'ätro . Ûn po quello che za passa in te tûtti i settoî commerçiali : a bittega a vegne ammassâ da-o sûpermercou , o sûpermercou da l'ipermercou , l'ipermercou da-o çentro commerçiale . In America son za sartæ ditte de Multiplex perchè s'ammassavan fra de liätri . Fâ comme a Zena de aumentâ e sale , no porta a ûn aumento de pûbblico , ma se disperde a gente pe fâ scì che e sale no possan crovî ciû e speise . E i vëgi çinema zeneixi mêuan ...........
< vanni a toua di argomenti >
 
 

 I ANTIGHI LIGÛI DO LEVANTE 

Vëgia Ligûia o Ligûia de vëgi ?

Se vive sempre ciû , se diventa vëgi e a risentîne l'è o mercou do travaggio e l'INPS . A Ligûia a l'è a region dove l'è stæto rilevou o  rapporto ciû erto de vëgi in sciö totale da popolassion con etæ sotta i chinze anni . Mentre in Italia gh'è 'nna meddia nassionale de 129,0 , in ta nostra region l'è 238,9 . Doppo a Ligûia gh'è l'Emilia Romagna (191,9) a Toscann-a e o Friuli Venezia Giulia (188,1) . 
I ciû zoeni pe contra son in Campania , ma Puglia e Sicilia son ascì misse ben . 
A Ligûia a vinçe ascì quande se parla de etæ meddia (46,3) . Tûtto questo compòrta ascì ûn peiso in scë spalle de chi lòua : e ascì in te sto caxo chi a nostra region a guidda a clascifica .
Voeivo segnalâve ûn libbro façile c'o se lëze con piäxei , ma no pe questo che o no segge de valô storico . "I antighi Ligûi in to gorfo da Spezza " editô LUNA e öto Valerio Marco Botto : de sta popolassion ben poco se conosce e men che meno da-i libbri da schêua italiann-a . O Botto o mette ben in ciæo comme tûtti i spostamenti preistoriçi di Ligûi tra Leriçi e Portovenere aggian segnou profondamente a cultûa de quello territöio . Vegnan piggiæ in consciderassion ascì i rapporti a votte boin a votte cattïi con Romma , i scangi cultûali co-i Çelti e a particolaritæ do lö scistema religioso . O libbro o pêu ëse ûn bon iniçio pe conosce chi ëan i Ligûi e piggiâ di spunti da poei dappêu approfondî . 

Valerio Marco Botto 
“Gli antichi Liguri nel golfo della Spezia” 
Luna Editore (via XXIV maggio 223 19124 La Spezia )
tel. e fax 0187 518248  pp. 112 -  lire 22mila.

< vanni a toua di argomenti >



STELLA MARIS
(AVE MARIA IN ZENEIZE)

Campann-a che ti sêunni in mëzo a-o verde
co-a voxe secolare e tanto cäa
in questa paxe l’anima a se perde
e i tò reciocchi invitan a pregâ

(RIT.)

AVE MARIA
a-o fà da seia
quande in te l’ombra
s’asconde o mâ
AVE MARIA
co chêu sincero
e ûn cäo pensiero
pe chi è lontan
AVE MARIA
pe chi va via
co-a nostalgia
do sò fogoâ
AVE MARIA
pe chi l’è in penn-a
pe chi ha ‘na spinn-a
ciantâ in to chêu
O STELLA MARIA
AVE MARIA !!
avarda sempre chi l’è pe-o mâ !
 

E passan öe , giorni , meixi e anni
chi nasce , cresce , invëgia e scomparià
a vitta a passa in mëzo a tanti affanni
ma sempre a tò cäa voxe ghe restià .

RIT......

< vanni a toua di argomenti >


"Avventura Politica di Mirko ODEPEMKO con Sergio CASTELLANETA"

Alcuni mesi orsono, dopo aver invitato ed incontrato il Dott. Sergio Castellaneta presso l'emittente Radio fonica "Radio Lanterna City" e dopo essermi letteralmente innamorato della persona e dell'uomo politico, decisi di candidarmi al consiglio Comunale con Liguria Nuova.
Il movimento mi mise a disposizione, su mia richiesta, da novembre 2001, una sede in via della Cella 52 rosso, che portammo avanti, in modo a mio avviso , producente e cercammo subito di entrare a contatto con la realtà commerciale, artigiana e cittadina di Sampierdarena - dove per altro ci sono nato 26 anni fa'.
Nel frattempo, anche perchè credevo sempre più in questa avventura-esperienza, ho costituito un gruppo che faceva da satellite alla mia candidatura, composto da candidati nelle varie circoscrizioni genovesi , ovviamente con Liguria Nuova.
Più il tempo passava e più mi rendevo conto che il movimento non era affatto organizzato e che il Dott. Sergio Castellaneta era un accentratore nel senso più negativo del termine. Insomma non c'era nessun dibattito politico all'interno del movimento - ne' tantomeno lo spazio per farlo - e se non si aveva la stessa visione politica del nostro Leader non se ne poteva esprimere una diversa.
Entrai, subito dopo, visto anche il mio carattere, in collisione con il Leader per quanto riguarda una visione completamente differente sull'ambiente e quindi sulla pulizia della città (ma questo fu il male minore).
Le "frecciate", e non solo, sulla chiesa e i poteri forti mi misero assolutamente in imbarazzo verso le persone e le associazioni a me vicine . Cercai di spiegare al Dottore la mia cristianità e la mia fede verso Dio, ma lui la ridicolizzò più volte - basta ascoltare le registrazioni di dibattiti televisivi e di conferenze.
Iniziai a cambiare atteggiamento politico e passai molte delle mie giornate presso mercati e piazze per far conoscere il mio nome e per alzare il quorum verso il movimento . Dopo alcune settimane di grande lavoro capii che la figura di Sergio Castellaneta non era più così forte e ben vista dalla cittadinanza - davano molte più garanzie Pericu e Magnani - e quindi decisi con i miei collaboratori di incentrare la campagna sulla mia figura di giovane che può portare, all'interno del Consiglio Comunale una voce nuova
soprattutto perchè l'età media del Consiglio era ed è molto alta.
Sergio Castellaneta, amante della sua persona e "narciso", ha impedito ogni mia iniziativa spinta a far crescere sempre più Liguria Nuova, preferendo proteggere i soliti "reciclati della politica" - coloro che cambiano partito ad ogni campagna elettorale e coloro che ci hanno provato almeno 3/4 volte ad entrare nelle istituzioni, senza alcun risultato.
In questo modo chi ci ha perso, in tutto ciò è stato il Movimento Liguria Nuova che non è mai decollato perchè soffocato dalla figura del Leader; ci ha perso anche l'immagine stessa del Dott. Sergio Castellaneta che non è riuscito, a mio avviso, a svecchiare il movimento e la sua persona e, soprattutto, a spersonalizzare il movimento che non ha mai avuto un corpo direttivo.
Sicuramente oggi se non si da un assetto diverso al movimento le teste migliori se ne andranno come era successo anche nella passata campagna elettorale (1997).
Come ha detto più volte lo stesso Dott. Sergio Castellaneta , pubblicamente: "io sono un politico terminale" e come tale, aggiungo io, dovrebbe puntare sui giovani brillanti che vogliono mettersi in discussione e a disposizione per la cittadinanza.
Se mi è consentito fare un'ultima analisi politica, si sono persi molti voti anche per la insignificante candidatura e soprattutto una candidatura poco felice e fatta senza le dovute riflessioni e, a mio avviso , senza il dovuto "coraggio", della candidatura alla Presidenza della Provincia. Ci si è lasciati sfuggire mille diverse occasioni ed opportunità fra le quali quella del Prof. Franco BAMPI che poteva essere un ottimo valore aggiunto per il movimento vista la sua indiscussa cultura.
Sono comunque contento di questa esperienza perchè in 6 mesi ho imparato moltissime cose e ho imparato, soprattutto, a non "innamorarmi", così facilmente, dei Leader Politici.

Mirko ODEPEMKO


< vanni a toua di argomenti >
 
 

A petacchinn-a do meise


M'è capitou a zûgno de vedde in sciä Rai e partïe de ballon Italia-Mescico e dappêu de rivedde Corea-Italia. Mai aivo notou tanta parsialitæ do Pizzul e do Bulgarelli in to commentâ e immagini, o foscia saieiva mëgio dî che no g'aivo mai fæto caxo .
Italia Mescico
Han commensou comme sempre co-a stöia di inni , che i zûguei italien no cantan mai . Sta votta quarchedûn l'ha cantou , ma tant'è no l'anava ben a-o mæximo perchè i mescichen l'aivan cantou mëgio , co-a man in sciö chêu . Dappêu i dui novelli nassionalisti han dæto inissio a-o spettacolo : passe o fæto che tûtte e votte che gh'ëa 'n italian in tæra l'ëa fallo e quande gh'ëan i mescichen ëan söo sceneggiate , ma o cormo o s'è avûo quande doppo ûnna gömmiâ de Vieri in ta göa de 'n mescican , vista ascì rallentâ , o Pizzul e o "balilla" Bulgarelli n'han dïto che a corpa a l'ëa do mescican che o l'ëa cheito in sciö gömmio de Vieri . Peccou che o gömmio o l'ëa a artessa d'ommo ...............  L'antisportivitæ do "balilla" Bulgarelli  a s'è vista quande , mentre i tifosi mescichen cantavan festosi e lö cansoin , o l'è sciortïo dixendo c'o l'avieiva gödou se l'Italia a l'avesse segnou mentre  cantavan "Mexico, mexico , ra ra ra " .  A sorte , cäo "balilla" , a l'ha invece vosciûo che a segnâ fuise l'ûnico mescican de ciæa origine italiann-a , tal Borgetti . Pe-i dui telecronisti l'Italia a l'è stæta sfortûnâ , ma pe mi a sfortûnn-a a l'è quande ti piggi di pali o de traverse e a balla a sciorte fêua , no quande no ti tïi manco in to spëgio da porta .
Corea-Italia
Ascì chi Pizzul e Bulgarelli se son scatenæ : han visto complotti e erroî de l'arbitro in ogni momento . Bastava c'o scigoesse contra l'Italia pe dî c'o l'aiva sbagliou . Incredibili poi i muri de sti dui quande doppo 4 minûti o l'ha dæto o rigô ä Corea : quande ascì vista l'assion a-o rallentatô l'ëa ciæo che no gh'ëa ûn rigô .... ma due , han avûo e facce da cû da negâlo . Foscia besorrieiva ammiâ e partïe co ûn po de imparsialitæ e se dieivan meno belinate . Ma se l'arbitro o l'avesse vosciûo fâ vinçe a Corea , comme o Pizzul e o Bulgarelli sotta sotta dixeivan , ma perchè a Corea a l'ha pareggiou söo a 'n minûto dä fin grassie a'n errô do Panucci ? Dove a l'è chi a corpa de l'arbitro ?
Emblematica a l'è stæta a frase da giacchetta neigra Moreno in te 'n intervista : " Ma che corpa g'ho mi ,  se o Vieri o s'è mangiou o gol decisivo davanti ä porta ? " .
No vêuggio parlâ dappêu de sceneggiate do Trapattoni : cäsci a-e bottiggie , crïi , pûgni in scï veddri , tûtte cöse fortemente disedûcative pe-i figgêu c'ammian o ballon e che dovieivan imparâ propio da sti campioin chi correttessa e sportivitæ . Invece n'han mostrou che no san perde , paivan comme quande s'ëa figgêu e che gh'ëa quello c'o no voeiva perde e ä fin o se piggiava o ballon , perchè o l'aveiva portou lë , e o se ne anava .
Ammiando o Trapattoni e stando a sentî o Pizzul e o Bulgarelli ho capïo che no besêugna ciû domandâse dove a nasce a violensa in ti staddi . Dui telecronisti parsiali e indisponenti , fomentatoî e istigatoî ä violensa ..............




N.D.R.
Comme ben savei a compagnia telefonica Wind  a l'ha sciorbïo Infostrada e dunca ascì i portali Libero e IOL . Cangian coscì e modalitæ de intrata ä pagina do Faro Ligure . In ätre poule ghe saià ûn cangiamento in scë l'addresso che da o vëgio : Http://spazioweb.inwind.it/ilfaroligure o diventa Http://spazioinwind.iol.it/ilfaroligure

 
 
E notissie de sto scïto chi son piggiæ in gïo pe-a ræ , ma  sövia tûtto da : 
LA REPUBBLICA-IL LAVORO
IL SECOLO XIX
LA PADANIA 

< vanni a toua di argomenti

Questo sito è ottimizzato percon una risoluzione 1024 x 768